Sa janë gjasat që të bëhet kryeministër? Përgjigjet Glauk Konjufca

Glauk Konjufca, i mandatuar nga Albin Kurti për të formuar qeverinë e re në Kosovë nuk tregoi nëse ka siguruar votat e nevojshme për formimin e qeverisë, ndërsa tha se ende nuk kanë caktuar datën e seancës ku do të “matet” në Kuvend.

Në një prononcim për mediat pasi votoi të dielën, Konjufca u shpreh se nëse Kosova do të ketë një qeveri të re apo do të shkohet në zgjedhje të parakohshme, nuk varet tërësisht nga Lëvizja Vetëvendosje, pasi nevojiten edhe votat e partive të ish-opozitës.

Konjufca është mandatuar për kryeministër më 4 nëntor nga presidentja Vjosa Osmani. Afati i fundit për të thirrur seancën për votimin e qeverisë është 19 nëntor.

Mandatari i parë nga LVV-ja, kryeministri në detyrë Albin Kurti, më 26 tetor ka dështuar të marrë votat e nevojshme në Kuvend për ta formuar qeverinë.

“Nuk e di saktë me probabilitet sesa i kam gjasat të bëhem kryeministër. Unë mendoj se Kosova do ta ketë një qeveri, por në fund të fundit mendoj se nuk varet krejtësisht nga LVV-ja. Kësaj radhe zgjedhjen a do të kemi qeveri të re apo do të shkojmë në zgjedhje, në dorë e kanë partitë që ne po iu themi opozitare… Ne e kemi në dorë për me propozuar mandatarin e dytë, me këtë rast unë u propozova ku edhe presidentja më mandatoi si kandidat. Kabineti im dhe unë si kryeministër do të dalim në seancë kur ne do të vendosim ditën e saktë. A do të votohem apo jo, më së shumti në dorë e kanë deputetët e partive të tjera. Ju e dini se deri tani në këtë kompozicion tonë të numrave të mazhorancës nuk kanë qenë më shumë sesa 56-57”, tha ai.