VIDEO/ Shfaqet në Tiranë dokumentari “117”, Rita Ora dërgon urim special

I konsideruar nga studiuesit si portret shpirtëror i kombit, filmi dokumentar “117” i skenaristit dhe regjisorit Besim Sahatçiu është shfaqur në Tiranë, në kuadër të Javës së Kulturës së Kosovës.

Filmi tregon jetesën e një familjeje prej 117 anëtarësh që jetojnë në një çati dhe sjell një dëshmi unike të jetës tradicionale shqiptare, në kuadër të Javës së Kulturës së Kosovës.

Filmi i restauruar ofron një kujtesë të gjallë vizuale për një formë bashkëjetese që sot nuk ekziston më.

I pranishëm në shfaqjen e filmit ishte kineasti Afrim Spahiu, drejtor i fotografisë së filmit, përfaqësues nga Qendra Kinematografike e Kosovës, ndërsa Rita Ora, mbesa e regjisorit Besim Sahatçiu, përcolli përmes videos një përshëndetje speciale.

Kineasti Afrim Spahiu tha se ky film është gur themeli për historinë filmike të Kosovës.

“Ky film është i veçantë pasi pasqyron një moment të rrallë. Grupi i punës arriti të regjistrojë jetën e kësaj familjeje me 117 anëtarë brenda 24 orëve” ,tha ai.

Në këtë film, regjisori vendosi që fotografia të fliste vetë, pa narracion, duke i dhënë filmit një dimension artistik që e shndërroi në një vepër ikonike.

Filmi është realizuar nga “Kosova Film” në vitin 1976.