Fotoalbum/ Begaj, Rama dhe Osmani në mbrëmjen festive të 28 Nëntorit

Kryeministri Edi Rama, në një postim në rrjete sociale, ka shpërndarë foto nga festa në ambientet e Presidencës ku zhvillua mbrëmja tradicionale kushtuar Ditës së Pavarësisë, një aktivitet që mblodhi së bashku personalitete të larta të politikës dhe përfaqësues të trupit diplomatik në vend.

E pranishme në këtë ceremoni ishte edhe Presidentja e Kosovës, Vjosa Osmani, e cila mori pjesë në festimet zyrtare së bashku me krerët më të lartë të shtetit shqiptar.

Presidenti i Republikës, Bajram Begaj, ishte i pranishëm bashkë me Zonjën e Parë, Armanda Begaj ndërsa Kryeministri Edi Rama ishte i shoqëruar nga bashkëshortja e tij, Linda Rama.

“Mbrëmja Tradicionale Kuqezi e Ditës së Pavarësisë, organizuar bukur si asnjëherë nën kujdesin e Presidentit të Republikës, me praninë kuptimplotë të Presidentes së Kosovës”, shkruan Rama.

Mes të ftuarve u panë gjithashtu ministra, deputetë dhe ish-deputetë të Partisë Socialiste, Kryetari i Kuvendit, Niko Peleshi, Ministrja për Punët e Jashtme, Elisa Spiropali, si dhe ish-Kryetari i Kuvendit, Gramoz Ruçi.

Të pranishëm ishin edhe përfaqësues të trupit diplomatik në vend dhe përfaqësues të komuniteteve fetare, të cilët u bashkuan në aktivitetin festiv për nder të 28 Nëntorit, Ditës së Pavarësisë së Shqipërisë.

Ndërkohë, ra në sy mungesa e përfaqësuesve nga partitë opozitare, të cilët nuk u panë në këtë aktivitet zyrtar.

LEXONI GJITHASHTU:

• 29 Nëntori/ Rama: Urime festën kombëtare të Çlirimit
• Shqipëria përkujton 81-vjetorin e Çlirimit