Kërkoi të hynte në Rripin e Gazës, Izraeli ndalon komisioneren e BE-së

Komisionerja e BE-së për Barazinë dhe komisionere në detyrë për Menaxhimin e Krizave, Hadja Lahbib, njoftoi se Izraeli nuk i dha leje të hyjë në Rripin e Gazës gjatë vizitës së saj në Egjipt. Lahbib tha se kishte planifikuar të kalonte kufirin për të parë situatën nga afër, por refuzimi i Izraelit “na trishtoi thellësisht”.

Ajo theksoi se situata humanitare në Gaza po përkeqësohet çdo ditë, duke raportuar se që nga fillimi i armëpushimit të fundit janë vrarë 347 palestinezë, mes tyre 67 fëmijë. Sipas saj, Gaza është shndërruar në një “varrezë” ku edhe punonjësit humanitarë janë në rrezik të vazhdueshëm, me rreth 600 prej tyre të vrarë.

Lahbib paralajmëroi se dimri do të jetë “katastrofik” për palestinezët, të cilët nuk kanë as strehim dhe as mundësi ngrohjeje. Ajo kërkoi vazhdimin e armëpushimit, zbatimin e ligjit ndërkombëtar dhe kalimin në fazën e dytë të marrëveshjes, që përfshin çarmatimin e Hamasit dhe kthimin e pengjeve.

Komisionerja theksoi se ndihma që hyn në Gaza mbetet shumë e kufizuar dhe kritikoi klasifikimin e disa artikujve humanitarë si “me përdorim të dyfishtë”, gjë që ngadalëson proceset. Ajo u bëri thirrje autoriteteve izraelite të lejojnë OJQ-të të punojnë pa pengesa.

Gjatë vizitës së saj në Egjipt, Lahbib vizitoi El Arishin, një depo me ndihma të destinuara për Gazën dhe një spital ku po trajtoheshin të evakuuar nga enklava, duke falënderuar Egjiptin për mbështetjen e tij.