Turqia prezanton dronin e ri kamikaz me krahë dhe teston një tjetër Skydagger

Industria e mbrojtjes e Turqisë të enjten prezantoi një dron të ri kamikaz (FPV) me krahë fiks dhe e testoi me sukses lëshimin e parë në ajër. Droni i ri është produkt i kompanisë Skydagger, e cila vitin e kaluar filloi prodhimin e dronëve kamikaz FPV dhe që nga atëherë ka ndërtuar një familje sistemesh me rotor.

Tani ajo është zgjeruar në dizajne me krahë fiks. Haluk Bayraktar, drejtor i përgjithshëm i gjigantit të dronëve Baykar, tha se sistemi i ri është quajtur Skydagger Toyca-05, duke e përshkruar si UAV-në më të re kamikaze të Turqisë.

Një video në platformën ‘X’ tregon dronin me krahë fiks duke u lëshuar nga një katapultë dhe duke kryer manovra agresive.

Sipas Baykar, Toyca-05 ka një rreze prej 70 kilometrash, një kapacitet për mbajtje eksplozivi prej 5 kilogramësh, mbrojtje kundër ndërhyrjeve elektronike dhe ka të integruara teknika të fluturimit si FPV ashtu edhe plotësisht autonome.

Ndërkohë, Skydagger ka kapacitet të prodhojë më shumë se 30,000 njësi të këtij droni me krahë fiks çdo vit.

Kompania publikoi gjithashtu pamje nga një test i rëndësishëm për industrinë turke të mbrojtjes, siç është lëshimi në ajër me sukses i dronit kamikaz Skydagger 7 FPV nga UAV-ja Bayraktar KALKAN VTOL.

Testi shënoi integrimin e dy sistemeve të ndryshme UAV duke operuar së bashku.

Droni VTOL Kalkan, i përdorur zakonisht për misione zbulimi, vëzhgimi dhe inteligjence, mund të shërbejë gjithashtu si platformë ajrore për lëshimin e municioneve më të vogla ose dronëve kamikaz. Ky konfigurim mund të rrisë ndjeshëm rrezen dhe qëndrueshmërinë e dronit të lëshuar.

LEXONI GJITHASHTU:

• Ambasadori izraelit në SHBA: Turqia nuk duhet të marrë avionë amerikanë F-35
• Turqia mes Rusisë dhe Ukrainës, Brahaj: Ja pse Erdogan nuk reagon për luftën