Sot shënohet Dita Botërore e Luftës kundër HIV/AIDS, pse testimi mbetet thelbësor

1 Dhjetori shënon Ditën Botërore të Luftës kundër HIV/AIDS, një datë e rëndësishme që prej vitit 1988 dhe e dedikuar rritjes së ndërgjegjësimit për virusin HIV, mbështetjes për personat e prekur dhe forcimit të përpjekjeve globale për parandalim dhe trajtim.

Në këtë kuadër, mjekët infeksionistë na kujtojnë se parandalimi, testimi dhe trajtimi shpëtojnë jetë.

HIV nuk është një dënim dhe menaxhohet me sukses kur diagnostikohet herët dhe trajtohet rregullisht.

Mjekja infeksioniste, Esmeralda Meta, thotë se më të prekurit nga kjo sëmundje infektive janë grupmoshat mbi 14 vjeç.

“HIV/AIDS është sindroma madhore infektive që u bë mbi tre dekada te ne. Është një sëmundje me peshë. Më të prekurit janë adultët mbi 14 vjeç. Mesazhi i rëndësishëm është testimi nga grupmoshat e reja dhe grupet në rrezik, si dhe gratë shtatzëna, për trajtimin dhe parandalimin e hershëm. Testimi në Shqipëri është kudo: në spitale, në njësitë vendore të kujdesit shëndetësor. Më shumë të prekur janë meshkujt sesa femrat. Deri më tani nuk ka një vaksinë, ndaj këshillohet konsultimi me mjekët për parandalimin e saj”, thotë mjekja.

Transmetimi seksual mbetet rruga kryesore e marrjes së këtij infeksioni (93% e rasteve). Transmetimi nga nëna tek fëmija zë 4% të rasteve dhe transmetimi nëpërmjet gjakut zë 3% të rasteve në total.