Reagimet pas Kolegjit Zgjedhor, Kaso dhe Kaziaj: Beteja do të vazhdojë në disa plane

Ivi Kaso, përfaqësues ligjor i Partisë Demokratike shprehu keqardhjen sa i takon rrëzimit të kërkesës së PD-së për rishqyrtimin e rezultatit të zgjedhjeve.

“Jemi të keqardhur që një kërkesë e tillë nuk u pranua pasi në mënyrë të shpejtuar dhe jo në përputhje me standardet e Kodit Zgjedhor, kjo kërkesë për provë u vlerësua si kërkesë e cila nuk lidhej me fakte konkrete të ndodhura në qarkun e Gjirokastrës,” – tha Kaso.

Sipas tij fakte dhe prova të reja do të dilnin çdo ditë derisa të vërtetoheshin të gjitha pretendimet e Partisë Demokratike.

“Është një mendim që ne nuk e ndajmë dhe kjo i parapriu vendimmarrjes përfundimtare që ishte ajo e rrëzimit të kërkesës sonë për pavlefshmëri. Jemi të sigurt që fakte dhe prova të reja do dalin përditë sa veprimtaria e organeve të administratës të dali në dritën e diellit dhe para gjykimit të gjithë shqiptarëve dhe ne si Parti Demokratike as nuk kemi hequr dorë dhe do vazhdojmë të mos heqim dorë nga kërkesa dhe këmbngulja jonë për të bërë transparencë në çdo aspekt të errët të gjithë këtij procesi elektoral,” – shtoi Kaso.

Nga ana tjetër, edhe Altin Kaziaj, përfaqësues ligjor i Lëvizjes Socialiste për Integrim shprehu keqardhjen për këtë vendim.

“Opozita nuk ka se si pranon një vendim të dhënë në këto shkaqe. Nuk ka sesi pranon faktin që mos marrja parasysh e kërkesave të karakterit procedurial nga ana e Partisë Demokratike dhe LSI nuk merret në shqyrtim nga Kolegji Zgjedhor,” – u shpreh Kaziaj.