Pasioni për futbollin, 16-vjeçarja sfidon steriotipet se futbolli luhet vetëm nga djemtë

Duke pasur familjen e saj tifozen më të zjarrtë, 16-vjeçarja Jehona Coka nisi karrierën në një fushë të vështirë për vajzat. Ajo tani luan me ekipin Kombëtar U-17 Jehona Coka, por për të arritur këtë i është dashur të lerë pas në moshën 13-vjeçare, familjen e saj në Kukës.

“Sapo mora vesh që ekzistonte Kampionati Kombëtar i Futbollit për femra erdha në Tiranë. Unë jetoj më vëllain dhe gjatë rutinës simë të përditshme, përveç shkollës dhe stërvitjes në futboll më duhet të kujdesem për veten dhe vëllain”, – rrëfen Jehona.

Jehona luan për ekipin e Tiranës, por provën e parë si futbolliste e ka bërë të ekipi i Kinostudios. Pozicioni i saj në fushën e blertë gjatë ndeshjeve është mesfushore e majtë me tipare sulmuese.

“Në moshën 13 vjeçare kam bërë proven e parë me një ekip profesionist, me ekipin e Kinostudios. Ishte një seancë stërvitore me grupin dhe pasi ajo rezultoi e suksesshme, trajneri vendosi të më mbante në ekip. Duke qenë se isha 13 vjeç dhe nuk luaja dot e federuar duhet të prisnim sa të mbushja 14 vjeç”, – tregoi 16-vjeçarja për “GenZ” në Euronews Albania.

Gen Z është një produkt i projektit “Youth of Tirana” mbështetur nga Bashkia Tiranë.

Synimi i saj është të luajë me ekipin Kombëtar të Futbollit A dhe ka ëndërr të takojë Ronaldon, futbollistin e saj të preferuar.

Jehona tregon se në fillim i ka përjetuar pak keq paragjykimet dhe mungesën e vëmendjes te futbolli i femrave, por tani është mësuar. Gazetarja sportive Viola Spiro ka disa këshilla për Jehonën nga eksperienca e saj në botën e sportit.

“Nëse ti punon dhe e ke me shumë dëshire do ia dalësh. Do doja që të rinjtë të aktivizohen më shumë në çdo lloj sporti, pasi ndikon te shëndeti dhe mirëqenia mendore”, – përfundon Viola.