Frika nga coronavirusi, Qeveria e Maqedonisë së Veriut anulon tubimet publike deri më 6 mars

Qeveria në Maqedoninë e Veriut ka rekomanduar anulimin e të gjitha tubimeve masive publike, si masë për parandaluese për coronavirusin, shkruan KosovaPress. Aktualisht këto masa do të vlejnë deri më 6 mars, por mundësia për masa të reja do të ngelet e hapur, në varësi të rrethanave të krijuara nga coronavirusi.

Ngjarjet sportive të caktuara për këtë periudhë nuk anulohen, por do të bëhen pa prezencën e publikut.

Propozimi i Qeverisë ka të bëjë me tubimet më të mëdha publike të cilat janë planifikuar në këtë periudhë, si dhe karnavalet e Strumicës, karnavalet në Prilep dhe të tubime të ngjashme. Qeveria e RMV iu ka rekomanduar organizatorëve të ngjarjeve sportive dhe garave në periudhën deri më 6 mars të bëhen pa prezencën e publikut. I njëjti rekomandim i Qeverisë vlen edhe për të gjitha manifestimet tjera argëtuese dhe kulturore e artistike.

Ministri i Shëndetësisë, Venko Filipçe ka informuar se një udhëtar i cili është kthyer nga Italia në Strumicë, më 22 shkurt, është paraqitur me temperaturë të lartë. Ai ka theksuar se materiali i nevojshëm për analizë është marrë dhe rezultatet e testit për coronavirus priten gjatë ditës. Në klinikën infektive në Shkup tashmë po kurohet një person i diagnostifikuar me coronavirus, ndërsa 12 persona janë në izolim për shkak të kontakteve që kanë pasur me persona të prekur nga coronavirusi.