Komandanti i lartë i NATO-s: Evropa do t’ia dalë mbanë me më pak trupa amerikane

Komandanti Suprem i NATO-s në Evropë, gjenerali amerikan Alexus Grinkevich, tha se beson që Evropa do të përballojë më mirë me më pak trupa amerikane në Kontinentin e Vjetër.

“Evropa nuk do të kishte probleme edhe nëse SHBA-të do të tërhiqnin disa nga forcat e tyre”, tha Grinkevich, sipas Politico.

Ai thotë se Evropa dhe Kanadaja kanë kapacitete të mjaftueshme dhe NATO është gati për çdo krizë. Sipas tij, mosmarrëveshjet politike nuk kanë ndikuar në gatishmërinë operacionale të NATO-s dhe rritja e investimeve evropiane do të forcojë më tej mbrojtjen, edhe nëse SHBA-të tërheqin më shumë trupa.

Grinkevich shtoi se ekziston rreziku që Rusia së shpejti të vërë në provë mbrojtjen kolektive të NATO-s, ndërsa paralajmëroi gjithashtu për një rrezik afatgjatë. Ai tha se sulmet hibride janë një problem serioz dhe se NATO po shqyrton përgjigje më aktive, megjithëse nuk dha detaje.

Politico vlerëson se këto deklarata vijnë në një kohë kur pritet strategjia e re e Presidentit të SHBA-së, Donald Trump, e cila mund të çojë në tërheqjen e disa trupave amerikane nga Evropa dhe një ridrejtim drejt Indo-Paqësorit.

Si mbështetje për këtë pretendim, Politico citon vendimin e Uashingtonit për të tërhequr 800 trupa nga Rumania muajin e kaluar, gjë që shkaktoi zemërim në Bukuresht.

LEXONI GJITHASHTU:

• NATO ristrukturon komandën për të forcuar sigurinë në veri
• Shefi i NATO: Rusia, Kina dhe Korea e Veriut po përgatiten për sulm ndaj Europës