Si inteligjenca artificiale po përmirëson efikasitetin e sistemit shëndetësor

Një kompani suedeze, Tandem Health, ka zbuluar se mjetet e inteligjencës artificiale (AI) ulin ndjeshëm kohën që mjekët shpenzojnë për shënime mjekësore.

Analiza e mbi 375,000 shënimeve të bëra nga rreth 1,300 mjekë në 11 vende të Europës tregoi se AI ka reduktuar kohën e shkrimit të shënimeve me 29% – nga 6.69 minuta në 4.71 minuta për çdo vizitë.

Mjekët, si mjekë familjeje, kirurgë, psikologë dhe infermierë, thonë se ndihen më të qetë, më të pranishëm gjatë konsultave dhe më pak të lodhur nga detyrat administrative.

Studime të tjera tregojnë se dokumentet janë një nga shkaqet kryesore të lodhjes profesionale.

Kompania thotë se përdorimi i AI mund të ndihmojë sistemet shëndetësore europiane, të cilat përballen me mungesë personeli dhe kosto të larta.

Sipas drejtuesve të Tandem Health, është e rëndësishme që Europa të mbledhë të dhëna të veta për përdorimin e AI në shëndetësi, jo vetëm të mbështetet te studimet nga SHBA.

Këto të dhëna mund t’i ndihmojnë qeveritë dhe spitalet të kuptojnë më mirë se si AI mund të përmirësojë punën, kushtet e mjekëve dhe efikasitetin e sistemit shëndetësor.