Arrestoi ish-kolegun dhe hetoi Llallën, historitë e hetimit të Klodian Brahos

Drejtuesi i ri i SPAK, Klodian Braho, ka nisur misionin si prokuror në vitin 2007, kur pas përfundimit të Shkollës së Magjistraturës u emërua në Berat, ku shërbeu deri në vitin 2012.
Më pas ai u transferua në Vlorë deri në vitin 2015, ku mbajti edhe detyrën e zëvendësdrejtuesit të prokurorisë.
Gjatë kësaj periudhe ai ishte një ndër prokurorët që hetojnë ish-kryebashkiakun Shpëtim Gjika, ndërsa më pas Braho iu bashkua Prokurorisë për Krime të Rënda deri në vitin 2019, kur kaloi në SPAK si pjesë e grupit të parë të prokurorëve që nisën punën.

I konfirmuar në detyrë nga vetingu, Braho në SPAK deri dje drejtonte seksionin kundër korrupsionit. Kreu i ri i SPAK ka hetuar disa dosje të profilit të lartë, mes tyre atë ndaj ish-kryeprokurorit Adriatik Llalla, çështjet e inceneratorëve, 5D, ish-ministrin e Mbrojtjes Fatmir Mediu për tragjedinë e Gërdecit, si edhe dosje abuzimesh me fondet publike e pastrimit të parave.

Njihet si prokurori i ftohtë i “jakave të bardha” dhe gjithashtu është prokurori që hetoi dhe vijon të hetojë dosjen “Toyota Yaris”, duke arrestuar ish-kolegun e tij, drejtuesin e Prokurorisë së Vlorës, Aurel Zarka.

Kohët e fundit, Braho është takuar edhe me zyrtarë të lartë amerikanë që kanë vizituar Shqipërinë dhe kanë ndaluar në SPAK, duke shprehur mbështetjen për Prokurorinë e Posaçme.

LEXONI GJITHASHTU:

• Kush e votoi Klodian Brahon nga anëtarët e KLP-së, zbardhet lista e votimit
• Kush është Klodian Braho, Kreu i ri i SPAK që zë vendin e Dumanit