Dashuri, xhelozi dhe hakmarrje, “Il Trovatore” rikthehet në TKOB

Në Teatrin Kombëtar të Operas dhe Baletit është rikthyer “Il Trovatore”, kryevepra botërore e Giuseppe Verdit, e cila erdhi me një produksion të ri të firmosur nga regjisori i mirënjohur Roberto Catalani.

Kjo shfaqje, e cila premierën e saj e ka patur në vitin 1853, risolli në Tiranë një nga emrat më njohur të skenës operistike, tenorin me famë ndërkombëtar Josif Gjipali, që vjen në rolin e Manricos ndërsa për herë të parë, debutoi në skenën shqiptare mezzosopranoja me famë ndërkombëtare Enkeleida Shkoza.

Ndërthurja e dashurisë, xhelozisë dhe hakmarrjes e bën edhe më tragjike historinë e Manricos dhe Leonorës, rolin e së cilës në kastin e parë do ta interpretojë Eva Golemi.

E vendosur në Spanjën e trazuar të shekullit të 15-të, me linjën muzikore të fuqishme të Verdit, ariet e njohura dhe tensionin e lartë dramatik, “Il Trovatore” do të shfaqet në skenën e Teatrit Kombëtar të Operas dhe Baletit edhe më datat 12 dhe 13 dhjetor.