Udhëtim mes fotove dhe monografisë, përjetësohet ikona e pikturës Nexhmedin Zajmi

35 vite nga ndarja e tij nga jeta, figura e Nexhmedin Zajmit vjen përmes një monografie me foto të rralla, 130 piktura, materiale arkivore dhe një analize artistike të zgjeruar përmes botimit të albumit dhe monografisë së një nga emrave më të rëndësishëm të pikturës shqiptare.

Piktorë, skulptorë, pedagogë, studentë dhe personalitete të kulturës shqiptare vlerësojnë krijimtarinë e artistit, ndërsa i biri, Uvil Zajmi, thotë se ka qenë një punë e vështirë dhe tejet emocionale “risjellja në jetë” e të atit.

“Mu rikthyen në pak sekonda nga një faqe tek tjetra: Zajmi në mëngjes, kur dilte herët për të marrë qumështin me cigaren ‘Partizani’, që nuk e ndante, nuk përdorte shkrepëse. Pastaj ai vraponte për të shkuar në studio. Gjeta kavaletin, pashë tubetat, aty gjeta edhe shishet me benzinë që ne mbanim në shtëpi për ta pastruar kur kthehej nga studioja i lyer. Aty gjeta Zajmin, angazhimin e tij në prag të ekspozitave, punën pafund, netë pa gjumë, momentin kur bashkë me të çonim pikturat në ekspozitë mbrëmjeve, në natë, që mos të na shihte njeri. Ky album ma riktheu këtë lloj emocioni, këtë lloj komunikimi të humbur prej 35 vjetësh me Zajmin piktor dhe artist,” tha Zajmi.

Pjesa e parë e albumit i kushtohet jetës së Nexhmedin Zajmit që nga fëmijëria, shkollimi fillor dhe i mesëm, ardhja në Tiranë dhe shkollimi, dhe takimet e para me pedagogët Andrea Kushi, Odhise Paskali, Abdurrahim Buza të cilët ishin ata që zbuluan talentin e tij.

Më pas vijojnë vitet e Romës, një etapë thelbësore në formimin e tij artistik e cila shoqërohet me fotografi të rralla dhe materiale dokumentare.

Pjesa e tretë është një analizë shkencore e realizuar nga Oltsen Gripshi.