Ish-presidenti brazilian do të dalë nga burgu, do t’i nënshtrohet një operacioni

Gjykata Supreme e Brazilit miratoi të martën kërkesën e ish-presidentit, Jair Bolsonaro për t’u liruar nga burgu që t’iu nënshtrohet një ndërhyrjeje kirurgjikale ditën e Krishtlindjeve.

Kërkesa u miratua pasi policia federale hetoi rastin dhe e konsideroi ndërhyrjen kirurgjikale “të justifikuar”. Ai do t’i nënshtrohet një ndërhyrjeje kirurgjikale për hernie inguinale.

Bolsonaro, 70 vjeç, ka vuajtur dënimin e tij në njësinë e policisë federale në Brasilia që nga fundi i nëntorit. Ai ka qenë në gjendje të dobët shëndetësore që nga një sulm me thikë në vitin 2018 gjatë fushatës së tij zgjedhore.

Nuk është e qartë se sa kohë do të qëndrojë në spital. Në prill, Bolsonaro iu nënshtrua një tjetër ndërhyrjeje të rëndë kirurgjikale në klinikën DF Star, ku dhjetëra mbështetës të tij u mblodhën jashtë spitalit.

Gjykatësi gjithashtu lejoi që gruaja e tij, Michelle Bolsonaro, ta shoqëronte gjatë gjithë kohës së shtrimit në spital.

LEXONI GJITHASHTU:

• Ekonomia amerikane rritet me ritmin më të shpejtë në dy vjet
• Rrëzohet aeroplani humanitar në Teksas! Pesë të vdekur, mes tyre dhe një 2-vjeçar