Tre persona kapen me mina me telekomandë në Durrës, do i shisnin nga 3 mijë euro

Tre persona janë arrestuar në flagrancë nga Policia në Durrës pasi u kapën me mina me telekomandë.

Operacioni erdhi pasi Specialistët për Hetimin e Krimit në bashkëpunim me Sektorin e Trafiqeve të Paligjshme dhe te Krimeve Kundër Personit kishin siguruar informacion se disa persona me tendencë kriminale në fushën e prodhimit dhe shitjes së minave me telekomande po tentonin të shisnin disa mina me telekomandë.

Arrestimi i Ilir Alliu, 47 vjeç, Bledar Çakalli, 31 vjeç dhe Edmond Bardhi, 37 vjeç, të tre lindur në Dibër dhe banues në Sukth, Durrës, u bë në vendin e quajtur “Muzeu”, në lagjen nr. 9 në Durrës.

Ata u kapën duke udhëtuar me një automjet tip “Volvo” me drejtues Ilir Alliu,  dhe pasagjerë shtetasit Bledar Çakalli dhe Edmond Bardhi. Gjatë kontrollit, forcat e policisë gjetën tri mina të montuara dhe të lidhura me telefon.

Nga hetimet paraprake rezulton se këta persona do t’i shisnin minat me telekomandë në qytetin e Durrësit, kundrejt shumës 2500-3000 euro copa.

Në bashkëpunim me Prokurorinë vijon puna për identifikimin dhe kapjen e personave të tjerë të përfshirë në këtë veprimtari kriminale.