“Krishtlindje në Pediatri” studentët e mjekësisë shpërndajnë dhurata për 250 fëmijë në QSUNT

Studentët e vitit të 3 të Fakultetit të Mjekësisë, kanë gëzuar me dhurata fëmijët që gjenden të shtruar në spitalin e pediatrisë në Qendrën Spitalore Universitare. Nisma e tyre “Krishtlindje në Pediatri” ka bërë të mundur që të vegjëlit e sëmurë ti gëzohen festës dhe të mos ndihen vetëm.

“Kjo ide lindi disa vite më parë, sepse vëllai im ka qenë i shtruar në pavionin e pediatrisë. Atëherë studentët kishin realizuar një nismë të tillë për festat e Vitit të Ri dhe ajo gjë na preku shumë”, tha Nismëtari, Orgito Sopiku.

“Qëllimi i këtij viti është që të siguroheshim që të gjithë fëmijët e shtruar në pavionet e pediatrisë të pajiseshin me ndonjë dhuratë, prandaj ne kemi arritur të sigurojmë 250 dhurata dhe në të njëtën kohë kemi arritur që të ndihmojmë disa familje fëmijët e të cilëve janë të shtruar në reparte të ndryshme të pediatrisë , me disa vlera monetare”, theksoi Alesia Baruti.

Për të vegjlit u organizua edhe një festë në hollin e shërbimit të pediatrisë, ku kënduan dhe kërcyen me personazhet e tyre të preferuar.