VIDEO/ E rëndë në Elbasan, gjendet një person i djegur, çfarë dihet deri më tani

Një person është gjetur i djegur në një ambient të përshtatur për banim, në katin e parë të një pallati pranë stadiumit “Elbasan Arena”, ndërsa rrethanat e ngjarjes mbeten ende të paqarta. Sipas burimeve paraprake, mësohet se personi që ka ndërruar jetë është një burrë i moshës 66 vjeçare.

“Në lagjen “Luigj Gurakuqi”, shtetasi E. A., 66 vjeç, dyshohet se ka rënë në kontakt me rrymën elektrike në banesën e tij dhe, si pasojë, ka humbur jetën”, njofton policia.

Ndërhyrja e shërbimeve zjarrfikëse është bërë pasi banorët e pallatit kanë sinjalizuar erë djegieje. Zjarrfikësit kanë hapur me forcë qepenin e ambientit, ku kanë gjetur një person të seksit mashkull në gjendje të rëndë shëndetësore, me djegie të rënda dhe pa ndjenja.

Ndërkohë, për rreth një orë, energjia elektrike është ndërprerë në një pjesë të bllokut të banimit në lagjen “5 Maj”, si masë sigurie.

Nga të dhënat paraprake dyshohet se personi mund të ketë rënë aksidentalisht në kontakt me rrymën elektrike, por autoritetet nuk përjashtojnë as pista të tjera. Policia ka nisur hetimet për zbardhjen e plotë të rrethanave të ngjarjes.