Rubio: Maduros iu bënë disa oferta për t’u larguar nga pushteti, por ai zgjodhi të “luante”

Sekretari i Shtetit i SHBA-së, Marco Rubio, tha sot se presidenti venezuelian, Nicolas Maduro, pati disa mundësi për të shmangur arrestimin dhe shtoi se situata në Kubë do të jetë temë diskutimi sepse SHBA-të “dëshirojnë të ndihmojnë popullin e Kubës, ngjashëm me rastin e Venezuelës”.

“Nicolas Maduro u padit në Shtetet e Bashkuara në vitin 2020. Ai nuk është presidenti legjitim i Venezuelës, por një i arratisur nga drejtësia amerikane”, tha Rubio, duke shtuar se Maduro mori oferta bujare, por “në vend të kësaj vendosi të sillet si një ‘kafshë e egër’ dhe të luajë”, raportoi NBC News.

I pyetur nëse deklarata e Trumpit për dëshirën e SHBA-së për t’u “rrethuar me stabilitet” i referohet edhe udhëheqësit të Kubës komuniste, Miguel Diaz-Canel, Rubio tha se situata në Kubë do të jetë një temë diskutimi.

“Kuba aktualisht po shembet dhe ne duam t’i ndihmojmë njerëzit, ngjashëm me rastin e Venezuelës, por edhe kubanezët që u detyruan të largoheshin nga vendi dhe të jetonin këtu”, tha Sekretari i Shtetit i SHBA-së.

Sipas Sky News, Rubio shtoi se Trump është serioz në deklaratat e tij.

“Nëse do të jetoja në Havana dhe do të isha pjesë e qeverisë, do të isha i shqetësuar”, përfundoi Rubio.

Shtetet e Bashkuara të Amerikës kryen sulme ajrore në Venezuelë sot dhe Trump njoftoi se forcat speciale amerikane arrestuan presidentin e Venezuelës, Nicolás Maduro, dhe gruan e tij, Cilia Flores, dhe i nxorën ata nga vendi.