Qeveria e Kubës: 32 kubanë u vranë gjatë sulmit amerikan në Venezuelë

Qeveria kubaneze tha se 32 shtetas të saj u vranë gjatë operacionit amerikan për të kapur udhëheqësin venezuelian Nicolás Maduro.

Kuba i përshkroi të vdekurit si anëtarë të forcave të saj të armatosura dhe agjencive të inteligjencës të vrarë “në veprime luftarake”, duke shpallur dy ditë zie kombëtare, shkruan BBC.

Forcat e armatosura shtuan se kubanezët “ranë, pas rezistencës së ashpër, në luftime të drejtpërdrejta kundër sulmuesve ose si rezultat i bombardimeve të instalimeve”.

Kuba, një aleat i hershëm i Venezuelës, për vite me radhë i ka furnizuar Maduros me sigurinë e tij personale dhe ka personel në të gjithë ushtrinë venezueliane.

Presidenti kubanez Miguel Díaz-Canel tha se vendi i kishte ofruar mbrojtje Maduros dhe gruas së tij “me kërkesë” të Venezuelës.

Spiunët amerikanë kishin monitoruar lëvizjet e Maduros për muaj të tërë përpara se forcat amerikane të sulmonin, sipas gjeneralit amerikan Dan Caine.

Gjenerali Caine tha se ata kishin mësuar se ku lëvizte, jetonte, udhëtonte, hante dhe punonte ish-udhëheqësi.

New York Times raportoi se CIA kishte rekrutuar gjithashtu një “burim venezuelian”, i cili thotë se i informoi amerikanët për vendndodhjen e saktë të Maduros.

Shumë prej të vrarëve besohet se kanë qenë pjesë e forcave të sigurisë së Maduros, të cilët ishin me të në atë kohë.

Venezuela nuk ka konfirmuar se sa njerëz u vranë, por forcat e saj të armatosura kanë thënë se një “pjesë e madhe” e ekipit të sigurisë së Maduros ishte midis viktimave.

Një deklaratë zyrtare nga qeveria kubaneze thoshte: “Bashkatdhetarët tanë e përmbushën detyrën e tyre me dinjitet dhe heroizëm”.