80 familje në Malësinë e Madhe pa drita, banorët: Mjerim në 2026!

Prej katër ditësh, banorët e fshatit Boriç i Vogël, në Malësi të Madhe, janë pa energji elektrike. Kjo situatë prek rreth 80 familje, të cilat përballen me vështirësi në aktivitetet e përditshme dhe raportojnë dëme ekonomike.

Më tej, banorët thonë se ndërprerjet e energjisë janë një problem i përsëritur ndër vite, edhe pse detyrimet financiare ndaj operatorit të shpërndarjes shlyhen rregullisht. Ata kërkojnë rikthimin e menjëhershëm të furnizimit dhe ndërhyrje për modernizimin e rrjetit, për të shmangur problematikat e mëtejshme.

“Mungesa e dritave është shumë problem. Nuk është prej katër ditësh, është ankesë që vazhdon prej 4 vjetësh. Jam punëtor pa punë momntalisht sepse edhe bizneset mbyllen”, shprehet një nga banorët.

Burime paraprake bëjnë me dije se ndërprerja e energjisë është shkaktuar nga kushtet e pafavorshme atmosferike, përfshirë reshjet e shiut dhe erërat e forta, si dhe amortizimi i rrjetit elektrik. Situata të ngjashme janë raportuar edhe në zona të tjera të Qarkut Shkodër.