Të shtëna në Minneapolis, agjentët federalë të imigracionit qëllojnë për vdekje një 37-vjeçare

Një grua 37-vjeçare humbi jetën pas të shtënave nga një oficer i Shërbimit Amerikan të Imigracionit dhe Doganave (ICE) në Minneapolis, njoftoi kryebashkiaku Jacob Frey. Incidenti ka shkaktuar tension dhe protesta në vendin e ngjarjes.

Sipas Departamentit të Sigurisë Kombëtare, një zyrtar federal qëlloi në mënyrë mbrojtëse pasi gruaja, sipas tyre, përdori automjetin e saj për të përplasur oficerët dhe dyshohet se u përpoq të shtypte forcat e rendit. Pamjet e siguruara nga mediat tregojnë një SUV ngjyrë gështenjë të përplasur pranë një automjeti të bardhë dhe dhjetëra banorë dhe kalimtarë që janë mbledhur pranë vendit të ngjarjes, i rrethuar me shirit policor.

Kryebashkiaku Frey tha se incidenti ka shkaktuar zemërim në komunitet dhe bëri thirrje për qetësi:

“E kuptoj zemërimin. Le të bashkohemi rreth shpresës, dashurisë, paqes dhe arritjes së drejtësisë.”

Ai gjithashtu kritikoi praninë e forcave federale në qytet, duke theksuar se veprimet e tyre nuk janë për krijimin e sigurisë.

Shefi i Policisë së Minneapolis, Brian O’Hara, tha se gruaja nuk ishte pjesë e ndonjë hetimi federal për imigracion dhe se ajo ishte ulur në automjetin e saj duke bllokuar një rrugë kur ndodhi incidenti. Ai theksoi se hetimi po kryhet nga FBI-ja dhe Byroja e Kapjes Penale të Minesotës, dhe se forcat lokale po bashkëpunojnë për të përcaktuar nëse është shkelur ndonjë ligj shtetëror.

Zëdhënësja e DHS-së, Kristi Noem, tha se agjentët po kryenin një veprim zbatues kur u sulmuan nga automjeti dhe përshkroi veprimet e gruas si “terrorizëm të brendshëm”. Ajo shtoi se agjencia mbështet veprimet mbrojtëse të agjentëve të ICE-së.

Incidenti ka nxitur protesta paqësore në Minneapolis, ndërsa zyrtarët kanë bërë thirrje për qëndrim të sigurt dhe respektimin e ligjit. Kryebashkiaku Frey dhe shefi O’Hara kanë theksuar nevojën për hetim të plotë dhe për të shmangur përshkallëzime të mëtejshme.

Gruaja u transportua në spital, ku më pas u shpall e vdekur. Bashkëshorti i saj ndodhet pranë spitalit. Identiteti i saj nuk është bërë publik, por autoritetet thanë se ajo ishte një grua e bardhë në moshë të mesme.