Çfarë ndodhi natën e arrestimit? Maduro dhe gruaja e tij u plagosën ndërsa përpiqeshin të fshiheshin

Nicolas Maduro dhe bashkëshortja e tij, Celia Flores, raportohet se janë plagosur gjatë një operacioni sekret me rrezik të lartë të Shteteve të Bashkuara, i cili synonte kapjen e tyre në kryeqytetin venezuelian, sipas zyrtarëve amerikanë dhe burimeve të njohura me çështjen.

Siç bëjnë të ditur mediat e huaja, lëndimet nuk i atribuohen përplasjes së drejtpërdrejtë me komandot amerikane. Përkundrazi, besohet se ato janë shkaktuar në momentet e panikut, teksa çifti po përpiqej të fshihej në një vend të sigurt, duke u përplasur me mure dhe dyer. Vlerësimet fillestare flasin për mavijosje dhe lëndime të lehta, pa shenja dhune nga ana e forcës elitare Delta Force.

Pak para agimit të së shtunës, në Venezuelë përfundoi një nga operacionet më të diskutueshme të SHBA-së, i cili zgjati gjithsej 2 orë e 28 minuta. Presidenti i vendit dhe bashkëshortja e tij u arrestuan brenda kompleksit të tyre në Fuerte Tiuna, baza më e madhe ushtarake në Karakas, dhe më pas u nxorën nga vendi nën mbulimin e një operacioni të gjerë ajror amerikan.

Sipas të njëjtave burime, forcat amerikane mbërritën në vendngjarje rreth orës 01:00 të mëngjesit dhe shpërthyen hyrjet e blinduara të rezidencës, duke i zënë në befasi të dy. Për hyrjen u përdorën granata shkrepëse, të cilat prodhojnë dritë intensive dhe zhurmë të fortë me qëllim çorientimin. Lëndimet mendohet se kanë ndodhur pak para ose gjatë kësaj faze, kryesisht nga përplasjet me sipërfaqet përreth.

Pas operacionit, të dy u transportuan me avion drejt Nju Jorkut dhe iu nënshtruan një ekzaminimi mjekësor në bazën Stewart Air të Gardës Kombëtare, në veri të qytetit. Gjatë paraqitjes së saj të parë publike, Flores kishte mavijosje të dukshme në fytyrë, ndërsa avokati i saj deklaroi se po shqyrtohej mundësia e thyerjes së disa brinjëve dhe se nevojitej një vlerësim i mëtejshëm mjekësor. Maduro, nga ana e tij, gjithashtu ka nevojë për monitorim për shkak të problemeve të përgjithshme shëndetësore.