Vendet evropiane thërrasin në takime ambasadorët iranianë, shkak dhuna ndaj protestuesve në Iran

Shumë vende evropiane kanë thirrur ambasadorët iranianë për të denoncuar shtypjen e dhunshme të protestave që po zhvillohen në vend. Franca thirri këtë të martë ambasadorin iranian në Paris për të denoncuar dhunën shtetërore të ushtruar pa dallim kundër demonstruesve paqësorë.

Ministri i Jashtëm në Francë, Jean-Noel Barrot shtoi se shtypja e protestuesve është e papranueshme, e padurueshme dhe çnjerëzore. Sipas tij nuk mund të ketë pandëshkueshmëri për ata që i drejtojnë armët e tyre kundër demonstruesve paqësorë”.

 “Ia përcolla këtë dënim Ministrit të Jashtëm iranian dhe do t’ia përsëris ambasadorit iranian në Francë, të cilin e thirra sot”, tha ai.

Spanja, Holanda, Finlanda, Portugalia dhe Belgjika njoftuan gjithashtu se sot ministritë e tyre të jashtme kishin thirrur përfaqësuesin e Republikës Islamike të Iranit në vendin e tyre për të protestuar kundër dhunës me të cilën po trajtohen protestuesit.

Ministria e Jashtme gjermane gjithashtu ka reaguar duke theksuar se veprimet brutale të regjimit iranian kundër popullit të vet janë tronditëse.

“Ne i bëjmë thirrje Iranit të ndalojë dhunën kundër qytetarëve të tij dhe të respektojë të drejtat e tyre. Ambasadori iranian u thirr sot në Ministrinë e Jashtme’, thuhet në reagim.

Ministri i Jashtëm i Italisë, Antonio Tajani dhe Portugalia gjithashtu kanë thirrur ambasadorin iranian. Lisbona bëri thirrje Iranit që të respektohen të drejtat e qytetarëve.