Vrasja e gjyqtarit Astrit Kalaja, Komisioni “Xhafaj” nis vëzhgimet në terren

Me kërkesë të Këshillit të Lartë Gjyqësor deputetë të mazhorancës dhe opozitës do të shohin nga afër kushtet e sigurisë në disa prej gjykatave kryesore të vendit.

Deri në fundin e muajit janar, anëtarët e komisionit “Xhafaj” do të bëjnë një vëzhgim të mjediseve ku kryhen seancat gjyqësore.  Qëllimi është për të parë nëse elementët e sigurisë si për njerëzit e drejtësisë dhe qytetarët në proces janë të garantuara. 

Në përfundim të këtij kontrolli parlamentar, komisioni “Xhafaj” do të bëjë një raport për kuvendin.

Të marten, i njëjti komision do të rikthejë diskutimin për disa ndryshime në ligjin për statusin e gjyqtarëve dhe prokurorëve. 

Nisma për të ndërhyrë në ligjet e reformës së drejtësisë është kundërshtuar nga Shoqata Kombëtare e Gjyqtarëve. Ajo pretendon se zgjedhja e kryetarëve të Gjykatave të Shkallës së Parë dhe Apelit bëhet nga KLGJ.

Sipas shoqatës ndryshimet e kërkuara në ligj i konfirmojnë ata si kryetarë të emëruar deri në 31 dhjetorin e 2028-ës, duke shmangur garën për drejtuesit e rinj në sistemin gjyqësor.