Spanja nën “mallkimin” e aksidenteve hekurudhor, një tjetër tren përplaset! Humb jetën makinisti

Pas tragjedisë së Adamuzit, një tjetër aksident i rëndë hekurudhor është regjistruar në Spanjë, këtë herë midis stacioneve Sant Sadurní d’Anoia dhe Gelida, rreth 40 kilometra larg Barcelonës.

Sipas autoriteteve, një mur anësor i rrugës u shemb mbi shinat pak para kalimit të trenit Rodalies, linjë lokale e udhëtarëve e operuar nga kompania Renfe, që lidh Barcelonën me zonat periferike. Si pasojë, treni doli nga shinat. Dyshohet se shembja u shkaktua nga moti i keq që prej disa ditësh ka përfshirë zonën, pas mbërritjes së stuhisë “Harry”.

Bilanci i aksidentit është tragjik: drejtuesi i trenit humbi jetën, ndërsa 40 persona mbetën të plagosur. Prej tyre, katër ndodhen në gjendje të rëndë shëndetësore.

Ndërkohë, edhe në rajonin e Katalonjës është shënuar një tjetër incident hekurudhor. Një tren rajonal doli nga shinat midis stacioneve Blanes dhe Maçanet, por fatmirësisht pa të lënduar. Autoritetet bëjnë me dije se aksidenti u shkaktua nga shkëmbinj që ranë mbi shina pas stuhisë së fortë që goditi provincën e Gironës të martën.

Autoritetet spanjolle kanë nisur hetimet për të zbardhur plotësisht shkaqet e ngjarjeve dhe kanë paralajmëruar masa shtesë sigurie për qarkullimin hekurudhor në zonat e prekura nga moti ekstrem.