Arrestohet 44-vjeçari kanadez, në listën e më të kërkuarve të FBI-së për trafik droge dhe vrasje

Ryan Wedding, ish-snowboarder olimpik kanadez dhe një nga dhjetë personat më të kërkuar të FBI-së, është arrestuar dhe akuzuar për drejtimin e një operacioni transnacional të trafikut të drogës, raportojnë mediat amerikane. Arrestimi i 44-vjeçarit i jep fund një kërkimi disavjeçar, gjatë të cilit ai kërkohej për akuza të rënda që përfshijnë trafik droge, vrasje dhe krim të organizuar

Sipas autoriteteve amerikane, Wedding dyshohet se jetonte në Meksikë nën mbrojtjen e kartelit të drogës Sinaloa. Ai akuzohet për drejtimin e një rrjeti të gjerë kriminal, përgjegjës për importimin e rreth 60 tonëve metrikë kokainë në vit në Los Angeles dhe për furnizimin më të madh të kokainës në Kanada, duke gjeneruar rreth 1 miliard dollarë në vit.

Prokurorja e Përgjithshme Pam Bondi ka deklaruar më herët se organizata e drejtuar nga Wedding operonte në të gjithë Amerikën e Veriut dhe në vende të tjera. Para arrestimit, ai ishte akuzuar gjithashtu për vrasjen e një dëshmitari federal në një çështje penale kundër tij, si dhe për manipulim dhe kërcënim të dëshmitarëve, pastrim parash dhe trafik narkotikësh.

FBI kishte vendosur një shpërblim prej 15 milionë dollarësh për informacion që do të çonte në arrestimin e tij. Zyrtarët amerikanë e kanë krahasuar Wedding me bosë të njohur të drogës në Amerikën Latine, si Pablo Escobar dhe Joaquín “El Chapo” Guzmán. Ai njihej me disa nofka, përfshirë “El Jefe”, “Giant”, “Public Enemy”, “James Conrad King” dhe “Jesse King”.

Autoritetet pretendojnë se Wedding e nisi aktivitetin e tij kriminal pas lirimit nga një burg federal amerikan në vitin 2011, ku kishte vuajtur dënim për shpërndarje kokaine, dhe se ka urdhëruar dhjetëra vrasje në SHBA, Kanada dhe Amerikën Latine. FBI pritet të japë më shumë detaje gjatë një konference për shtyp në Kaliforni.