Tre punonjës policie në Vlorë në “arrest shtëpie” për korrupsion dhe shpërdorim detyre

Agjencia e Mbikëqyrjes Policore, ekzekutoi vendimin e GJKKO-së duke caktuar masën e sigurimit personal “Arrest në shtëpi” ndaj tre punonjësve të policisë të Stacionit të Policisë Orikum:

• D. L., Inspektor krimesh
• A. J., Shef stacioni
• A. F., Specialist i Policimit në Zonë

Ata dyshohen për kryerjen e veprave penale “Korrupsion pasiv i personave që ushtrojnë funksione publike” në bashkëpunim dhe “Shpërdorim i detyrës”.

Hetimet e SPAK zbuluan se në shtator të vitit të kaluar, punonjësit e policisë kishin kërkuar dhe marrë 270,000 lekë nga një shtetas, në këmbim të shmangies nga përgjegjësia penale. Pas disa muajsh hetime me metoda speciale, u dokumentua implikimi i tyre në veprime korruptive dhe shpërdorim detyre.

Hetimet vazhdojnë për zbardhjen e plotë të rrethanave të ngjarjes.