Burgu i Fushë Krujës në rikonstruksion, 142 të dënuar transferohen në Peqin e Durrës

Mëngjesin e së shtunës ka nisur transferimi i 142 të burgosurve që vuajnë dënimin në burgun e Fushë-Krujës, drejt ambjenteve të burgut e Durrësit dhe të Peqinit. Vendimi vjen pas nisjes së rikonstruksionit të godinës së burgut të Fushë Krujës, thekson Drejtoria e Përgjithshme e Burgjeve. Nga 142 të burgosur, 57 u transferuan në burgun e Durrësit dhe 85 në atë të Peqinit.

Procesi është zhvilluar nën masa të shtuara sigurie dhe shoqërimi, nga forcat operacionale të sistemit të burgjeve, nën drejtimin e specialistëve përkatës.

Për garantimin e sigurisë gjatë lëvizjes, janë njoftuar dhe përfshirë Drejtoritë Vendore të Policisë në Tiranë dhe Elbasan, si dhe komisariatet përgjatë itinerarit të përcaktuar. Autoritetet bëjnë me dije se autokolonat kanë mbërritur pa asnjë problem në destinacionet përkatëse.

Në IEVP Durrës dhe IEVP Peqin janë zbatuar të gjitha procedurat standarde për pritjen, kontrollin dhe sistemimin e të dënuarve, nën mbikëqyrjen e drejtuesve të institucioneve respektive.