Rritet bilanci i viktimave nga rrëshqitjet e tokës në Indonezi, dhjetëra të zhdukur

Njerëzit u mblodhën pranë vendit në rajonin West Bandung të Java-s, duke pritur me dëshpërim lajme për të dashurit e tyre, ndërsa ekipet e shpëtimit, të cilët kanë frikë nga një tjetër rrëshqitje toke, kontrolluan zonën e paqëndrueshme.

Rrjedha e dheut dhe mbeturinave përshkoi fshatin Pasirlangu herët të shtunën, duke detyruar dhjetëra njerëz të evakuohen nga shtëpitë e tyre.

“Është e pamundur që ata të jenë ende gjallë. Dua vetëm që trupat e tyre të gjenden”, tha Aep Saepudin, i cili ka ardhur në fshat çdo ditë për të marrë përditësime rreth 11 anëtarëve të familjes së tij që janë të zhdukur.

“Më dhemb zemra. Ndihem shumë i trishtuar që e shoh motrën time të madhe në atë gjendje”.

Abdul Muhari, një zëdhënës i agjencisë kombëtare të fatkeqësive, konfirmoi të hënën se të paktën 17 persona u vranë dhe zyrtarët lokalë thanë se 73 prej tyre ende rezultojnë të zhdukur.

Më shumë se 50 shtëpi u dëmtuan rëndë nga katastrofa, e cila gjithashtu zhvendosi më shumë se 650 njerëz, shtoi agjencia lokale e katastrofave. Dhjetëra ekipe shpëtimi po kërkonin zonën rrëzë malit Burangrang këtë të hënë.

Ata gërmuan manualisht dhe përdorën pajisje të rënda, por thanë se u është dashur të ecin me kujdes nga frika e një rrëshqitjeje tjetër toke për shkak të tokës së paqëndrueshme dhe motit të keq.

“Ajo për të cilën shqetësohemi më shumë është rreziku i rrëshqitjeve të dheut të mëvonshme. Ndonjëherë, kur jemi në operacion, nuk përqendrohemi te shpatet që ende kanë potencial për rrëshqitje të dheut”, tha për AFP-në 25-vjeçari Rifaldi Ashabi.