Vengu: Buxheti i Mbrojtjes arrin nivel historik 2,03% të PBB-së

Ministri i Mbrojtjes, Pirro Vengu, deklaroi këtë të martë në Kuvend se Buxheti i Mbrojtjes për vitin 2025 arriti për herë të parë nivelin 2,03% të Prodhimit të Brendshëm Bruto, duke e cilësuar një arritje me rëndësi strategjike për vendin. Ai bëri të ditur se ky nivel është vendosur me Aktin Normativ të Dhjetorit 2025, i cili për herë të parë parashikon rritje të buxhetit të mbrojtjes në fundvit.

“Me Aktin Normativ të Dhjetorit 2025, Buxheti i Mbrojtjes arriti për herë të parë nivelin 2,03% të Prodhimit të Brendshëm Bruto, një arritje me rëndësi të veçantë strategjike për vendin”, tha Vengu. Ai shtoi se 97% e buxhetit të mbrojtjes për vitin 2025 është e ezauruar, duke rrëzuar çdo pretendim për keqmenaxhim të fondeve publike: “Të gjitha këto janë realizuar duke ulur deficitin dhe duke ulur borxhin publik. Sa herë që na akuzoni për keqmenaxhim apo për vjedhje, duhet të rikujtoni këtë fakt: ulje e borxhit dhe ulje e deficitit”, theksoi ministri.

Një tjetër element i rëndësishëm i këtij akti normativ lidhet me kompensimin e dëmeve nga zjarret që goditën vendin vitin e kaluar. Vengu nënvizoi se shteti ka reaguar në kohë, duke bërë të mundur ezaurimin e plotë të kompensimeve për bashkitë e prekura: “Edhe në këtë rast, kemi një shtet që reagon në kohë, reagon brenda vitit buxhetor dhe, falë këtij akti normativ, është bërë e mundur ezaurimi i plotë i kompensimeve për bashkitë e prekura nga zjarret”, tha ai.