Itali/ Zbulohet laborator kokaine në Firence në shtëpinë e një shqiptari, 4 të arrestuar

Policia italiane ka zbuluar një laborator për përpunimin e kokainës në banesën e një shtetasi shqiptar në Firence, duke sekuestruar 34 kilogramë lëndë narkotike. Sipas autoriteteve, sasia e drogës do të kapte në treg një vlerë prej rreth 700 mijë eurosh.

Në pranga ka rënë një 54-vjeçar shqiptar, si edhe tre shtetas kolumbianë, të dyshuar si të përfshirë në aktivitetin e paligjshëm. Hetimet nisën pasi policia vuri re lëvizje të dyshimta pranë banesës, çka çoi në monitorimin e zonës dhe më pas në kontrollin e ambienteve.

Mediat italiane raportojnë se brenda banesës u zbulua një laborator i mirëfilltë për përpunimin e drogës, i pajisur me peshore, presa, furrë, pompa, makina vakumi, qese, substanca prerëse si dhe pajisje të tjera të nevojshme për prodhimin dhe paketimin e kokainës. Gjithashtu, u gjetën edhe detektorë insektesh, të përdorur për të shmangur përgjimet.

Me urdhër të Prokurorit Publik në detyrë pranë Prokurorisë së Firences, katër të arrestuarit u shoqëruan në burgun Florence-Sollicciano. Më 22 dhjetor, GIP konfirmoi vlefshmërinë e arrestimeve, ndërsa të dyshuarit ndodhen aktualisht në paraburgim.