Humbi kontrollin dhe përfundoi në liqenin e Vaut të Dejës, arrestohet shoferi 32 vjeçar

Policia e Shkodrës ka arrestuar në flagrancë 32-vjeçarin Zef Buçaj, pas aksidentit të rëndë të ndodhur të mërkurën në aksin rrugor “Mjedë–Spathar”. Automjeti që ai drejtonte humbi kontrollin dhe pasi u përplas me barrierat metalike të urës së Spatharit përfundoi në liqenin e Vaut të Dejës.

Në automjet udhëtonin edhe dy pasagjerë, Ndok Çokaj dhe Arol Nikaj. Të tre janë nxjerrë nga uji nga shërbimet e emergjencës dhe janë dërguar për ndihmë mjekësore. Drejtuesi i mjetit dhe një prej pasagjerëve po trajtohen në Spitalin Rajonal të Shkodrës, ndërsa Arol Nikaj është dërguar për trajtim të specializuar në Spitalin e Traumës në Tiranë.

Policia njofton se materialet i janë referuar Prokurorisë së Shkodrës për veprime të mëtejshme ligjore, ndërsa hetimet vijojnë për përcaktimin e plotë të rrethanave dhe shkaqeve të aksidentit.