Situata e paqëndrueshme e motit, 642 familje pa energji elektrike në Devollin e Sipërm

Këtë të hënë, Prefektura e Korçës ka bërë me dije se aktualisht 642 familje në zonën e Devollit të Sipërm janë pa energji elektrike. Kjo situatë vjen si pasojë e motit të paqëndrueshëm në vend.

Sipas njoftimit të OSHEE-së, Fideri 5 i Nënstacionit Bilisht është pjesërisht në punë, çka ka sjellë ndërprerjen e furnizimit me energji për abonentët ruralë në zonat: Vidohovë, Miras, Qytezë, Cëte, Sinicë dhe Arzë.

Sipas raportimeve, ekipet e OSHEE-së ndodhen në terren dhe janë në gatishmëri për të ndjekur nga afër situatën, me qëllim riparimin e defekteve të evidentuara dhe rikthimin sa më shpejt të energjisë elektrike.

Autoritetet bëjnë me dije se furnizimi me energji për konsumatorët e rëndësisë së veçantë vijon normalisht.