Ministri i Jashtëm i Iranit: Rruga drejt marrëveshjes bërthamore ekziston nëse rikthehet besimi tek SHBA-ja

Ministri i Jashtëm i Iranit tha të dielën se negociatat bërthamore me SHBA-në janë ende të mundshme nëse mund të rivendoset besimi, ndërsa paralajmëroi se çdo përballje ushtarake do të përfshinte rajone më të gjerë.

Abbas Araghchi tha se nuk është i shqetësuar për luftën, por për llogaritjet e gabuara të nxitura nga dezinformatat dhe përpjekjet e jashtme për ta shtyrë Uashingtonin në konflikt.

Araghchi tha se Irani ka humbur besimin tek SHBA-të si partner negociues, por se vendet e rajonit po veprojnë si ndërmjetës për të përcjellë mesazhe dhe për të ndihmuar në rindërtimin e besimit.

“Për fat të keq, ne kemi humbur besimin tonë te Shtetet e Bashkuara si partner negociues. Ne duhet ta kapërcejmë këtë mosbesim”, tha ai.

Aragchi i përshkroi shkëmbimet aktuale si “të frytshme” dhe tha se ato mund të përgatisin terrenin për bisedime thelbësore.

Ai theksoi se fokusi duhet të jetë te “substanca” dhe jo te formati i negociatave, duke minimizuar rëndësinë nëse kontaktet janë të drejtpërdrejta apo të tërthorta.

Duke iu referuar qëllimit të deklaruar të Presidentit të SHBA-së, Donald Trump, për të parandaluar Iranin nga pajisja me armë bërthamore, Araghchi tha se Teherani pajtohet me këtë objektiv.

“Pra, unë shoh mundësinë e një bisede tjetër nëse ekipi negociator i SHBA-së ndjek atë që tha Presidenti Trump. Për të arritur në një marrëveshje të drejtë dhe të barabartë për të siguruar që nuk ka armë bërthamore. Sigurisht, në këmbim, ne presim heqjen e sanksioneve”, shtoi ai.

Aragchi hodhi poshtë zgjerimin e bisedimeve për të përfshirë programin e raketave balistike të Iranit ose grupet aleate rajonale, duke thënë se negociatorët nuk duhet të ndjekin “gjëra të pamundura”.

Lidhur me perspektivën e luftës me SHBA-në, ai tha se një konflikt do të ishte “një katastrofë për të gjithë”. Meqenëse bazat ushtarake amerikane janë të shpërndara në të gjithë rajonin, tha ai, luftimet në mënyrë të pashmangshme do të tërhiqnin shumë vende.