Tragjedia me familjen shqiptare në Itali, të afërmit të tronditur: Ishin model

Katër anëtarë të një familjeje shqiptare kanë ndërruar jetë në Itali, pas një rrjedhjeje gazi nga kaldaja në banesën ku jetonin. Tragjedia ka zhytur në zi fshatin Gryksh i Madh të Peqinit, vendlindjen e familjes.

Të afërmit e familjes shprehen të tronditur nga kjo tragjedi, duke theksuar se ishin një familje model.

“Ishin familje e mrekullueshme, si këtu si në Itali. Atë e kam djalin e tezes. Lajmin e morëm vesh nga televizori. I vëllai i merrte në telefon dhe nuk i përgjigjej njeri. Shkoi te shtëpia me 2 karabinierë dhe i gjetën të vdekur”, tregon mes lotësh i afërmi i Arti Kolës.

Viktimat, Arti Kola, Jonida Kola, Hajdar Kola dhe Xhesika Kola, jetonin prej disa vitesh në Itali, pas një periudhe emigrimi sezonal në Greqi. Sipas autoriteteve italiane, ata u gjetën pa shenja jete në zonën e Luccas, ndërsa hetimet për shkaqet e sakta vijojnë. 

Nga Grykshi i Madh në Peqin e deri në Porcari të Italisë, dhimbja është e përbashkët. Një tragjedi që bashkon dy komunitete, dy vende dhe lë pas një mesazh të hidhur për sakrificat e emigracionit dhe jetët e pafajshme të humbura shumë herët.