Biznese të regjistruara si familjarë, nis përditësimi i kontratave të energjisë

Furnizuesi i Shërbimit Universal, FSHU, pjesë e OSHEE Group, ka nisur procesin e përditësimit të kontratave të energjisë elektrike për klientët biznes, me synim zbatimin e tarifimit sipas sistemit të ri të pagesës.

Gjatë kontrolleve në terren janë konstatuar subjekte private që ushtrojnë aktivitet biznesi dhe tarifohen gabimisht si klientë familjarë me 8.5–9.5 lek/kËh, në vend të tarifës 14 lek/kËh për bizneset.

“FSHU u bën thirrje bizneseve, OJF-ve dhe personave fizikë që veprojnë si biznese të verifikojnë dhe përditësojnë kontratat e tyre, nëse rezultojnë ende të regjistruar si klientë familjarë, për të shmangur penalitetet. Procesi synon një tarifim të drejtë dhe nuk prek klientët që e përdorin energjinë vetëm për qëllime banimi”, thuhet në një njoftim të shpërndarë për mediat.

Përditësimi i kontratave mund të kryhet në sportelet e Qendrave të Kujdesit të Klientit të FSHU-së ose online, përmes platformës dhe aplikacionit të OSHEE-së.