Nigel Farage kërkon t’i japë fund kulturës së punës nga shtëpia në Britani

Nigel Farage i ka bërë thirrje Britanisë që t’i japë fund kulturës së punës nga shtëpia, duke pretenduar se punonjësit janë “më produktivë kur janë me qenie të tjera njerëzore”.

Udhëheqësi i Reform UK i tha 2,000 mbështetësve në një tubim në Birmingham se Mbretëria e Bashkuar kishte nevojë për një “ndryshim qëndrimi ndaj punës së palodhur, në vend të ekuilibrit midis punës dhe jetës personale”.

Z. Farage shtoi se njerëzit punojnë më mirë “si pjesë e një ekipi” në një zyrë dhe i përshkroi pretendimet se stafi është më produktiv në shtëpi si një “grumbull absurditetesh”.

Politikat e punës në distancë u prezantuan nga mijëra kompani gjatë izolimit për shkak të Covid-19. Numri i personave që punonin nga shtëpia u dyfishua midis fundit të vitit 2019 dhe fillimit të vitit 2022, nga 4.7 milionë në 9.9 milionë, sipas Zyrës për Statistikat Kombëtare. Të dhënat e fundit zyrtare nga fillimi i vitit 2025 tregojnë se 28% e fuqisë punëtore ishte në punë hibride, 13% punonin plotësisht nga distanca dhe 44% udhëtonin për në punë. Megjithatë, një numër i madh kompanish si Amazon, Boots dhe JP Morgan kanë kërkuar që punonjësit të kthehen në zyrë me orar të plotë.

Z. Farage u zotua fillimisht t’i jepte fund “kulturës së punës nga shtëpia” përpara zgjedhjeve lokale majin e kaluar, duke deklaruar se stafit në këshillat e Reform UK do t’i thuhej: “Ose punon nga zyra, ose ikën”.

Dje, zoti Farage tha gjithashtu se Reforma UK ishte tani në një “pozitë lufte zgjedhore të përgjithshme” dhe i bëri thirrje Kryeministrit të japë dorëheqjen. Ai shtoi se partia ishte e gatshme të luftonte dhe të fitonte zgjedhjet e ardhshme të përgjithshme, duke theksuar se kjo mund të ndodhte më shpejt nga sa pritej.

Gjithashtu, partia po planifikon të revolucionarizojë shërbimin civil, duke premtuar të shkurtojë 68,500 vende pune dhe të ulë faturën e pagave me 17% nëse arrin të fitojë zgjedhjet.

Të gjithë deputetët e Reform UK iu bashkuan kreut të partisë në skenë në fund të tubimit, ndërsa zoti Farage mirëpriti anëtarët e ekipit dhe të pranishmit në turmë.