Humbi jetën gjatë riparimit të makinës, arrestohet pronari i servisit për shkelje të rregullave të mbrojtjes në punë

Pas ngjarjes së rëndë të ndodhur ditën e djeshme në fshatin Dardhë, ku gjatë riparimit të automjetit të tij në servis, humbi jetën Leonard Duka, 23-vjeç, këtë të hënë është vënë në pranga pronari i subjektit.

Sipas raportimeve nga policia, në pranga ka rënë shtetasi I. P., 40 vjeç, i cili dyshohet se e kishte punësuar 23-vjeçarin dhe nuk i kishte siguruar mjetet e duhura të mbrojtjes në punë.

“Në vijim të informacionit të dhënë dje, për ngjarjen e ndodhur në servisin e shtetasit I. P., në fshatin Dardhë, ku humbi jetën gjatë riparimit të automjetit të tij, shtetasi L. D., 23 vjeç, bëjmë me dije se në vijim të veprimeve hetimore dhe procedurale të kryera nga specialistët për Hetimin e Krimeve të Komisariatit të Policisë Librazhd, në drejtimin e Prokurorisë, u arrestua në flagrancë shtetasi I. P., 40 vjeç, për veprat penale “Shkelja e rregullave të mbrojtjes në punë” dhe “Punësimi i paligjshëm”. 

Nga hetimet dyshohet se shtetasi I. P. kishte punësuar në mënyrë të paligjshme në subjektin e tij, shtetasit J. P. (vëllai i tij) dhe M. Q”, thuhet në njoftimim e policisë.