Përmbyset autobusi i punëtorëve bujqësorë, 6 të vdekur dhe 46 të plagosur në Brazil

Gjashtë pasagjerë humbën jetën të dielën në një aksident me autobus në një autostradë kombëtare në juglindje të Brazilit, ndërsa 46 të tjerë u plagosën dhe u dërguan në spitalet e zonës, njoftoi Departamenti i Zjarrfikësve të Sao Paulos.

Aksidenti ndodhi në autostradën BR-153, pranë qytetit të Marilia. Sipas mediave lokale, autobusit i shpërtheu goma e majtë e pasme, gjë që shkaktoi humbjen e kontrollit nga shoferi dhe përmbysjen e automjetit.

Gazeta braziliane Folha de S.Paulo raportoi se autobusi transportonte punëtorë bujqësorë nga shteti verilindor i Maranhão në shtetin jugor të Santa Catarina, ku ata do të merrnin pjesë në korrjen e mollëve.

Gjendja e pasagjerëve të plagosur mbetet e paqartë dhe autoritetet lokale po vijojnë hetimet mbi shkaqet e aksidentit.