Itali, abati u bën thirrje murgjve të tij të “largohen nga Netflix dhe mediat sociale”

Abati i një manastiri në Toskanë u ka bërë thirrje murgjve që jetojnë në resortin e izoluar të shmangin përdorimin e mediave sociale dhe shërbimeve të transmetimit, duke argumentuar se qelitë e tyre janë hapësira të shenjta lutjeje dhe “jo për Netflix ose platforma të tjera”.

Ati Matteo Ferrari paralajmëroi se teknologji të tilla dixhitale janë “të dizajnuara posaçërisht për të krijuar varësi” dhe “duhet të shmangen absolutisht”.

Ferrari, 51 vjeç, postoi një letër të gjatë në Facebook, në të cilën tha se angazhimi në mediat sociale si Instagram dhe TikTok , si dhe shikimi i filmave në internet, ishte një “sfidë për jetën monastike dhe fetare”.

E vendosur në mes të një parku kombëtar dhe e themeluar në fillim të shekullit të 11-të, Camaldoli është shtëpia e nëntë murgjve. Qëllimi kryesor është që murgjit t’i përkushtohen lutjes dhe leximit të teksteve të shenjta dhe, kur janë në qelitë e tyre, të kalojnë kohë në meditim të thellë.

“Nëse qelia shndërrohet në kinema, atëherë ku përfundon spiritualiteti ynë monastik?” pyeti veten Ferrari. Ai paralajmëroi se ekzistojnë ‘varësi’ të vërteta që mund t’i bëjnë murgjit të bëhen ‘ekspertë filmash në vend që të jenë kërkues të Zotit’.

Ai shtoi se do të ishte “shumë më e shëndetshme” që murgjit ta përdornin kohën e tyre “duke menduar për komunitetin”.

Në një intervistë me La Nazione, gazetën rajonale të Toskanës, Ferrari tha se qëllimi i tij nuk ishte të qortonte murgjit, por t’i ftonte ata të “reflektonin mbi një çështje që përshkon jetën e të gjithëve dhe nuk mund të injorohet”.