Raportimi i Euronews Albania për urën e Gjinikasit, reagon Ministria e Mbrojtjes: Nisin matjet për investim shtesë

Pas raportimit nga Euronews Albania për gjendjen e rënduar të urës së Gjinikasit në zonën e Moglicës, në Bashkinë e Maliqit, përfaqësues të Ministrisë së Mbrojtjes kanë shkuar në terren për të verifikuar situatën dhe për të marrë masat e nevojshme për ndërhyrje.

Burime zyrtare bëjnë me dije se specialistë dhe përfaqësues teknikë kanë kryer matjet paraprake në vend, si pjesë e procedurave për realizimin e një investimi shtesë që do të financohet nga Ministria e Mbrojtjes, me qëllim rikthimin e sigurisë dhe funksionalitetit të plotë të urës.

Ura e Gjinikasit, e cila lidh fshatin me rrugën kryesore, është dëmtuar rëndë dhe prej kohësh nuk lejon kalimin e automjeteve. Në mungesë të një zgjidhjeje përfundimtare, banorët janë detyruar të improvizojnë kalimin përmes trarëve të drurit dhe elementëve metalikë, duke rrezikuar jetën çdo ditë.

Raportimi mediatik nxori në pah vështirësitë e mëdha me të cilat përballen dhjetëra banorë të zonës, të cilët detyrohen të ecin për distanca të gjata për të arritur në banesat e tyre.

Ndërhyrja e Ministrisë së Mbrojtjes pritet të përshpejtojë procesin për rehabilitimin e urës, duke i dhënë zgjidhje një problematike të kahershme për komunitetin e Moglicës.