Çfarë është Seedance? Aplikacioni kinez i inteligjencës artificiale që ka tërhequr vëmendjen e Hollivudit

Një model i ri i inteligjencës artificiale i zhvilluar nga kompania kineze ByteDance, që qëndron pas platformës TikTok, ka tronditur Hollywoodin këtë javë — jo vetëm për aftësitë e tij teknike, por edhe për ndikimin e mundshëm në industritë krijuese.

I quajtur Seedance 2.0, modeli i ri mund të gjenerojë video me cilësi kinematografike, të kompletuara me efekte zanore dhe dialogë, vetëm nga disa udhëzime të shkruara. Klipet e realizuara me këtë teknologji, përfshirë video me personazhe të njohur si Spider-Man dhe Deadpool, janë bërë virale në rrjet.

Reagimi nga studiot e mëdha nuk ka munguar. Kompani si Disney dhe Paramount kanë akuzuar ByteDance për shkelje të të drejtave të autorit, ndërsa shqetësimet për teknologjinë shkojnë përtej çështjeve ligjore.

Seedance u lançua fillimisht në qershor 2025 pa shumë bujë, por versioni i dytë, i publikuar tetë muaj më vonë, ka ndezur debat të gjerë në industrinë e filmit dhe teknologjisë. “Për herë të parë, kjo duket si një prodhim i vërtetë kinematografik dhe jo thjesht si inteligjencë artificiale,” thotë Jan-Willem Blom nga studioja kreative Videostate.

Ndryshe nga modelet perëndimore që fokusohen kryesisht në përpunimin e imazheve nga tekstet, Seedance kombinon tekstin, pamjet dhe audion në një sistem të vetëm. Ngjashëm me mjete si Midjourney dhe Sora nga OpenAI, ai mund të krijojë video nga përshkrime të shkurtra — por në disa raste, vetëm një fjali mjafton për të prodhuar përmbajtje me cilësi të lartë.

Studiuesja e etikës së inteligjencës artificiale, Margaret Mitchell, e cilëson këtë zhvillim si një hap të rëndësishëm përpara, ndërsa shumë ekspertë dhe regjisorë besojnë se Seedance shënon një kapitull të ri në evolucionin e teknologjisë së gjenerimit të videove.