Rrëshqitja e tokës në Përrenjas-Librazhd, zhvendoset shtylla e tensionit të lartë, pa energji disa fshatra

Rrëshqitja masive e tokës në aksin Përrenjas-Librazhd ka bërë që shtylla e tensionit të lartë 110 kV, nr. 15, që lidh HEC Egnatia me nënstacionin e Librazhd të zhvendoset duke krijuar një situatë të rrezikshme.

Nga ana e OSHEE është bërë me dije se për këtë shkak është stakuar linja, çka do të shoqërohet me mungesë të energjisë elektrike për disa fshatra.

“Në kuadër të punimeve për demontimin e shtyllës Nr. 15, në Linjën 110 kV Librazhd – HEC Egnatia, si pasojë e rrëshqitjes së tokës në afërsi të saj, ju njoftojmë se në datën 22 shkurt 2026, duke filluar nga ora 08:00 deri në përfundim të punimeve, si masë sigurie do të stakohen dhe tokëzohen Linja 10kV, e Fidrit F3 Hotolisht në Nënstacionin Librazhd, si dhe linja 35kV Librazhd – Hec Dragostunjë.

Si rrjedhojë, gjatë kësaj periudhe do të mbeten pa energji elektrike këto zona në rrethin e Elbasanit: Fshatrat: Babje, Buzgar, Drapata Hotolisht, Dragostunjë, Ferrë, Frarë Hotolisht, Gurekuqe, Heci / Xhyrë dhe Hec Dragostunjë”, sqarohet në njoftim.