Libri i Giselle Pelicot bestseller në Francë, interes i lartë edhe në Gjermani e Angli

Sipas deklaratave të një përfaqësuesi për shtyp të shtëpisë botuese franceze në radion France Inter, autobiografia e Pelicot që është shfaqur si një simbol global kundër dhunës seksuale është shitur tashmë në 63,574 kopje që nga dita e publikimit deri të mërkurën, më 25 shkurt.

Botimet “Flammarion” zbuluan se u është dashur ta ribotojnë librin dy herë për të përmbushur kërkesën në rritje. Autobiografia e Giselle Pélicot, të cilën 73-vjeçarja e shkroi në bashkëpunim me gazetaren dhe autoren franceze Judith Perignon, po gëzon sukses të madh edhe jashtë vendit, sipas shtëpisë botuese “Flammarion”, ndërsa në Gjermani dhe Britani është në listën e librave më të shitur.

Në autobiografinë e saj, francezja 73-vjeçare rrëfen jetën e saj, martesën me Dominique Pélicot, me të cilin pati tre fëmijë dhe nipër e mbesa, si dhe përdhunimet që pësoi gjatë gati dhjetë viteve nga 50 burra, të panjohur për të, të cilët ish-burri i saj i kishte rekrutuar përmes një platforme takimesh online.

Dominique Pélicot drogoi dhe përdhunoi Giselle-n e pavetëdijshme, ndërsa ftonte edhe burra të të gjitha moshave dhe profesioneve në shtëpinë e çiftit, në fshatin e vogël Mazan në Francën juglindore dhe ai regjistronte përdhunimet e gruas së tij.

Gjyqi i profilit të lartë për përdhunim i Giselle Pélicot filloi në gjykatën penale të Avignonit në shtator 2024 dhe përfundoi në dhjetor të të njëjtit vit. Vendimi i Giselle për të mos e mbajtur gjyqin me dyer të mbyllura në mënyrë që “turpi të ndryshonte anë” dhe që turpi të mos binte më mbi viktimën, por mbi autorin e krimit, e bëri francezen 73-vjeçare një simbol global kundër dhunës seksuale.

Gjykata i dënoi përdhunuesit e Giselle Pélicot me burgim që varionte nga tre deri në 18 vjet, ndërsa i pandehura kryesore, Dominique Pélicot, u dënua me 20 vjet burg.