Ekstradohet nga Dubai Durim Bami, momenti i mbërritjes në Rinas

Është ekstraduar pak minuta më parë në masa të forta sigurie nga Dubai në Tiranë Durim Bami, një emër shumë i njohur i botës së krimit.

Ai akuzohet nga SPAK se ka krijuar kushtet për vrasjen e ish-deputetit socialist Arben Ndoka, si dhe të dy miqve të një emri tjetër të njohur, Ervis Martinaj.

Durim Bami ka qenë dy vjet i arrestuar në Dubai, ndërkohë që pasditen e sotme është bërë i mundur kthimi i tij në atdhe. Vetëm pak momente më parë, Durim Bami është dorëzuar nga autoritetet e Dubait policisë shqiptare për të vazhduar më tej me procedurat e ekstradimit. Ai do të njihet me akuzat e ngritura ndaj tij dhe do të fillojë procesi gjyqësor me kërkesën e SPAK.

“Si rezultat i bashkëpunimit dhe besimit mes Policisë së Shtetit dhe homologëve në Emiratet e Bashkuara Arabe, konkretizuar me shkëmbim intensiv informacioni dhe bashkërendim të veprimeve operacionale, mbrëmjen e sotme, në vijim të operacionit ndërkombëtar të koduar “The Wanted”, u finalizua procedura për ekstradimin nga Dubai, në Shqipëri, të shtetasit të shumëkërkuar D. B., 47 vjeç, banues në Krujë.

47-vjeçari ishte në kërkim ndërkombëtar, pasi më datë 15.05.2024, Gjykata e Posaçme e Shkallës së Parë Kundër Korrupsionit dhe Krimit të Organizuar i ka caktuar masën e sigurisë “Arrest në burg”, për veprat penale “Sigurimi i kushteve dhe i mjeteve materiale për të kryer vrasje”, “Grupi i strukturuar kriminal”, “Kultivimi i bimëve narkotike” dhe “Kryerja e veprave penale nga organizata kriminale, ose grup i strukturuar kriminal”.

Në Aeroportin e Rinasit, i shumëkërkuari u shoqërua nga Drejtoria e Forcës së Posaçme Operacionale, Forca Kombëtare e Sigurisë, Forcat “Shqiponja” dhe nga Policia e Burgjeve”, thuhet në njoftimin e policisë.