Takimi i ri “sekret” Trump-Mamdani dhe “dhurata” nga kryetari i bashkisë së Nju Jorkut

Kryebashkiaku i Nju Jorkut, Zohran Mamdani, tha se pati një takim produktiv me Presidentin e SHBA-së Donald Trump në Shtëpinë e Bardhë të enjten, gjatë të cilit ata diskutuan çështje të tilla si strehimi dhe ndalimet e studentëve për shkak të imigracionit.

Takimi i dytë midis tyre që kur Mamdani u zgjodh vitin e kaluar zgjati rreth një orë. Mamdani udhëtoi fshehurazi në Shtëpinë e Bardhë për takimin e së enjtes, me zyrën e tij që njoftoi takimin në minutën e fundit, pasi kryetari i bashkisë kishte mbërritur tashmë në Uashington. 

Kryebashkiaku i New York City postoi një foto të tij me Trump në X, duke vënë në dukje: “Pata një takim produktiv me Presidentin Trump këtë pasdite. Pres me padurim të ndërtoj më shumë banesa në New York City”.

Në foto, Trump duket duke mbajtur një variant të faqes së parë ikonike të Daily News me titull “FORD TO CITY: DROP DEAD”, një referencë për refuzimin e Presidentit Gerald Ford për të shpëtuar qytetin gjatë krizës financiare të vitit 1975. Faqja e parë variante që Mamdani i dha Trump paraqiste një foto të presidentit aktual në vend të Ford dhe titullin: “TRUMP TO CITY: LE TË NDËRTOJMË”.

Mamdani i shprehu gjithashtu shqetësim Trumpit në lidhje me arrestimin dje të studentes së Universitetit Columbia, Elmia Agayeva, me origjinë nga Azerbajxhani, nga Zyra e Imigracionit dhe Doganave (ICE). Presidenti amerikan më vonë e informoi atë se ajo “do të lirohet menjëherë”.

Studentja u arrestua dje në mëngjes nga pesë agjentë të ICE-së, të cilët hynë në një konvikt në këtë universitet të Nju Jorkut pa urdhër arresti, tha Claire Shipman, dekane e përkohshme e Universitetit të Kolumbias.

Anëtarët e ICE hynë “duke deklaruar se ishin oficerë policie që kërkonin një fëmijë të zhdukur”, shpjegoi ajo në një video që postoi në X. “Agjentët morën studenten tonë. Ishte një situatë e tmerrshme (…) krejtësisht e papranueshme për studentët dhe stafin tonë”, theksoi Shipman.

Elmina Agayeva konfirmoi në Instagram se ishte liruar. “Sapo dola (…) Jam e sigurt.”