Erdogan reagon për sulmin ndaj Iranit: Izraeli e ka helmuar procesin e negociatave

Presidenti i Turqisë, Recep Tayyip Erdogan, ka shprehur shqetësim të thellë lidhur me sulmet ajrore të përbashkëta të SHBA-së dhe Izraelit kundër Iranit, duke i cilësuar ato si rezultat të “provokimeve” të kryeministrit izraelit, Benjamin Netanyahu.

“Jemi thellësisht të trishtuar dhe të shqetësuar nga sulmet amerikano-izraelite kundër fqinjit tonë, Iranit,” tha Erdogan gjatë një fjalimi në një iftar në Stamboll. Ai shtoi se SHBA-të dhe Irani nuk kishin arritur të kapërcenin një “krizë besimi” në negociatat e tyre, ndërsa Izraeli e kishte “helmuar procesin”.

Erdogan gjithashtu theksoi: “Që të mos derdhet më gjak dhe që rajoni ynë të mos vuajë më shumë dhimbje, të gjithë aktorët – veçanërisht bota islame – duhet të ndërmarrin veprime urgjente. Si Turqi, ne kemi bërë – dhe do të vazhdojmë të bëjmë – çdo gjë që na bie mbi supe për të siguruar që çështjet të zgjidhen me qetësi dhe maturi, ashtu siç kemi bërë që nga dita e parë.”

Në një deklaratë të veçantë, Ministria e Jashtme e Turqisë paralajmëroi se përshkallëzimi midis Izraelit, SHBA-së dhe Iranit vë në rrezik “të ardhmen e rajonit tonë dhe stabilitetin global”. Ministria dënoi provokimet që mund të çojnë në dhunë të mëtejshme dhe u bëri thirrje të gjitha palëve t’i japin fund armiqësive menjëherë.

Ministria theksoi se çështjet rajonale duhet të zgjidhen me mjete paqësore dhe ofroi shërbimet diplomatike të Turqisë, duke deklaruar: “Turqia është e gatshme të ofrojë mbështetjen e nevojshme në lidhje me ndërmjetësimin”. Po ashtu, zyrtarët vunë në dukje se siguria e qytetarëve turq që jetojnë në vendet e prekura mbetet një përparësi kryesore.

Më herët sot, Izraeli dhe SHBA-të nisën një fushatë të gjerë ajrore kundër Iranit me qëllimin e deklaruar për ndryshimin e regjimit në vend. Irani ka reaguar me sulme me raketa balistike dhe dronë që synojnë Izraelin dhe asetet amerikane në vendet e Gjirit.