Theu masën “Arrest në shtëpi” dhe kanosi me pistoletë sportive një person, në pranga 31-vjeçari në Tiranë

Policia e Tiranës ditën e djeshme ka arrestuar në flagrancë një 31-vjeçar pasi dyshohet se ka thyer masën e sigurisë “Arrest në shtëpi” dhe ka kanosur një person për motive të dobta. Mësohet se 31-vjeçarit në momentin e arrestimit i është gjetur sasi kokaine dhe një pistoletë sportive.

Në kuadër të operacionit të koduar “One day”, në pranga ka rënë shtetasi A. P., 31 vjeç banues në Tiranë.

“Specialistët e Seksionit për Hetimin e Narkotikëve, në vijim të punës për evidentimin dhe goditjen e veprimtarive kriminale, pas informacioneve të siguruara për një shtetas që kishte thyer masën e sigurisë dhe posedonte lëndë narkotike, kanë organizuar dhe finalizuar operacionin policor të koduar “One day”.

Si rezultat, u arrestua shtetasi A. P., 31 vjeç, banues në Tiranë, i cili është kapur dje, nga shërbimet e Policisë, në rrugën “Dëshmorët e 4 Shkurtit”, me një sasi lënde të dyshuar narkotike Kokainë dhe 1 armë të dyshuar sportive”, thuhet në njoftimin e policisë.

Materialet procedurale iu referuan Prokurorisë së Tiranës, për veprime të mëtejshme.