EMRAT/ Po trafikonin 6 pistoleta, dy të rinj shtrihen në tokë nga policia te “Fresku”

Policia e Tiranës vuri në pranga dy të rinj te “Rrethi i Freskut” pas një aksioni kundër trafikut të armëve të zjarrit. Gjatë operacionit të koduar “Rotondo”, pas një hetimi dy mujor me metoda proaktive për të goditur një grup të trafikut të armëve të zjarrit, efektivët ndaluan një automjet ku po udhëtonin shtetasit Donati Jaku, 31 vjeç, banues në Shkodër, dhe Florian Gjeta, 22 vjeç, banues në fshatin Domje, ndërsa bashkëpunëtori i tyre, E. S., është shpallur në kërkim.

Gjatë kontrolleve në automjetin e drejtuar nga 22-vjeçari Florian Gjeta, u sekuestruan 6 pistoleta të dyshuara të trafikuara nga Mali i Zi, me qëllim shitjen në zonë, si dhe 4 celularë. Dy të rinjtë u arrestuan në flagrancë ndërsa u sekuestrua dhe automjeti tip “Volkswagen” me të cilin po udhëtonin.

Njoftimi i policisë

“Si rezultat i një hetimi të kryer për 2 muaj, me metoda proaktive, në koordinim me Prokurorinë e Tiranës, shërbimet e Komisariatit të Policisë Nr. 4, në vijim të kontrolleve dhe punës operative, me objektiv goditjen e veprimtarive kriminale të trafikimit dhe shitjes së armëve të zjarrit, finalizuan operacionin e koduar “Rotondo”.

Gjatë operacionit u vunë në pranga shtetasit D. J., 31 vjeç, banues në Shkodër dhe F. Gj., 22 vjeç, banues në fshatin Domje.

Automjeti që drejtonte 22-vjeçari dhe ku ishte pasagjer shtetasi D. J., u ndalua për kontrolle, në bashkëpunim me shërbimet e Forcës së Posaçme Operacionale të DVP Tiranë, në vendin e quajtur “Rrethi i Freskut”.

Nga kontrollet në automjet, u gjetën 6 armë zjarri (pistoleta SigSauer) të dyshuara të trafikuara nga Mali i Zi, me qëllim shitjen në këtë zonë. Armët e zjarrit u sekuestruan bashkë me automjetin tip “Volkswagen” që drejtonte shtetasi F. Gj., si dhe me 4 celularë.

Në vijim të hetimeve rreth kësaj veprimtarie kriminale, u identifikua dhe u shpall në kërkim bashkëpunëtori i dyshuar i të arrestuarve, shtetasi E. S..

Vijon puna për kapjen e shtetasit të shpallur në kërkim, si dhe në drejtimin e Prokurorisë, vijojnë hetime për të nxjerrë përpara përgjegjësisë penale, shtetas të tjerë që mund të jenë përfshirë në këtë rast.

Materialet procedurale iu referuan Prokurorisë së Tiranës, për veprime të mëtejshme”, njofton policia.